У рэдакцыю «ІВ» звярнулася жыхарка аднаго з населеных пунктаў раёна, які абслугоўвае аўталаўка. Яна і яе аднавяскоўцы звярнулі ўвагу на тое, што ў магазіне на колах алей і некаторыя іншыя прадукты каштуюць даволі шмат. Прытым, што ў звычайным магазіне райста, дзе ёсць выбар, тавар можна набыць па меншай цане, няхай і іншага вытворцы. Па якім прынцыпе выбіраюцца прадукты для аўталавак і ці не атрымліваецца так, што вяскоўцам вязуць самы дарагі алей?
Паступіла і яшчэ адно пытанне пра работу аўталавак, ужо ад іншай нашай чытачкі, якая пражывае ў в. Сялец. Яна выказала пажаданне, каб аўталаўка спынялася бліжэй да яе дома, бо ў другі канец вёскі ісці далёка. Ці магчыма па просьбах жыхароў павялічваць колькасць прыпынкаў магазіна на колах?
На пытанні нашых чытачоў адказала першы намеснік старшыні праўлення Івацэвіцкага райспажыўтаварыства Наталля ГРЫНЧЫК:
– Спачатку пра выбар прадуктаў для аўталаўкі. Асартыментны пералік тавараў, якія рэкамендаваны для продажу ў аўтамагазінах, устаноўлены пастановай Міністэрства антыманапольнага рэгулявання і гандлю Рэспублікі Беларусь. У ім – сацыяльна значныя тавары, тавары першай неабходнасці. Ва ўсіх нашых аўталаўках ёсць і гандлёвае, і халадзільнае абсталяванне, таму прывозім і малочную прадукцыю, і каўбасныя вырабы, і замарожаныя прадукты. Іх выбірае прадавец на складзе, кіруючыся асартыментным пералікам. Адна з абавязковых умоў – тавар павінен быць айчыннай вытворчасці. Таму калі прадавец бярэ алей, то ў першую чаргу беларускі. Але ў параўнанні з тым жа расійскім ён даражэйшы.
Ніхто не забараняе прадаўцу для альтэрнатывы ўзяць для продажу і імпартны алей і мець два віды прадукцыі з розным коштам, каб пакупнік мог выбраць, і мы звернем на гэта ўвагу. Зразумела, забяспечыць такі шырокі асартымент тавараў, як у стацыянарным магазіне, у аўтамагазіне фізічна немагчыма. Але нагадваю, што пакупнік можа рабіць заяўкі ў прадаўца: возім і вотруб’е, і цэмент, і нават халадзільнікі. Гандлёвыя надбаўкі фарміруем згодна з заканадаўствам. Напрыклад, на алей надбаўка складае 25 %. Таксама на кожным аўтафургоне райста, што вязе прадукты ў вёскі, пазначаныя нумары тэлефонаў гандлёвага аддзела, кіраўніцтва філіялаў, па якіх можна тэлефанаваць з прапановамі і пытаннямі. Калі ласка, звяртайцеся.
Што тычыцца пытання жыхаркі вёскі Сялец, то з ім яна звярталася і ў Івацэвіцкае райста, тлумачыць Наталля Грынчык. Справа ў тым, што ў в. Сялец ёсць стацыянарны магазін. Але ў сувязі з вялікай працягласцю вёскі ад яе жыхароў паступіла просьба, каб і аўталаўка ў Сялец завітвала хоць бы раз на тыдзень. Ім пайшлі насустрач, і ў 2021 годзе на сходзе грамадзян праз галасаванне было вызначана месца, дзе яна будзе спыняцца, – вул. Савецкая, 114.
12 студзеня 2022 года на сходзе грамадзян в. Сялец, які прайшоў з удзелам прадстаўнікоў райвыканкама, райста, мясцовай ўлады, зноў паднялі пытанне наконт месца прыпынку аўталаўкі. Прынялі рашэнне пакінуць адзін прыпынак, адрас папярэдні, як і графік. Такім чынам аўталаўка ў в. Сялец будзе спыняцца адзін раз на тыдзень, у чацвер, на вул. Савецкая каля дома 114, прадоўжыць сваю работу стацыянарны магазін у другім баку вёскі.
Усяго ў райста шэсць аўталавак, пяць – у філіяла «Аптовая база», адна – у філіяла «Целяханскі». Яны абслугоўваюць 51 населены пункт, дзе няма магазінаў, і па просьбах насельніцтва заязджаюць яшчэ ў 14, дзе магазіны ёсць. Маюцца ў раёне доўгія вёскі, дзе ў магазіна на колах больш чым адзін прыпынак. Колькасць прыпынкаў вызначана па ўзгадненні з сельвыканкамамі, на сходах грамадзян, зыходзячы з патрэб насельніцтва і магчымасцей райста. Для павелічэння колькасці прыпынкаў у той ці іншай вёсцы патрэбны важкія падставы. У Сяльцы ўсё ж ёсць звычайны магазін, а ў 51 вёсцы раёна, як бачыце, няма ўвогуле.
Ёсць і яшчэ адна навіна, звязаная з аўталаўкамі. Вырашаецца пытанне аб скарачэнні ліку выездаў аўталаўкі ў шэраг населеных пунктаў раёна. Размова ідзе пра тры дзясяткі вёсак, куды аўталаўка прыязджала тройчы на тыдзень, а будзе прыязджаць два разы ў тыдзень. Так будзе да 1 сакавіка. Ужо праведзены сходы грамадзян, дзе агучвалася гэтае пажаданне райспажыўтаварыства, асновай для якога стаў фінансавы стан спраў – ёсць неабходнасць у эканоміі. Людзі пайшлі насустрач і праз галасаванне пагадзіліся са зменамі ў графіку абслугоўвання. Засталося канчаткова ўзгадніць яго ў райвыканкаме.
Вольга ШЭЛЯГОВІЧ. Фота Валерыя МІСКЕВІЧА.