«Аграгарадкі – мэта нумар адзін»

Прэзідэнт аб пераводзе кацельняў на пелеты

Аляксандр Лукашэнка даручыў актыўна распаўсюджваць вопыт пераводу кацельняў у невялікіх населеных пунктах на выкарыстанне ў якасці  паліва драўняных пелетаў.

Як далажылі Прэзідэнту, з 11 тыс. усіх кацельняў у краіне (за выключэннем тых, якія адносяцца да «Белэнерга») 66 працэнтаў пераведзены ўжо на мясцовыя віды паліва. Ужо ёсць 40 раёнаў, дзе доля мясцовых энергарэсурсаў перавышае 70 працэнтаў, а ў некаторых набліжаецца да 100 працэнтаў.
З 2010 года ў рамках рэалізацыі дзяржпраграм 350 аб’ектаў пераведзены з прыроднага газу на мясцовыя віды паліва. Пры гэтым захоўваецца і магчымасць выкарыстання на іх газу.

Мясцовыя віды паліва, рэканструкцыя і мадэрнізацыя кацельняў дазваляюць не толькі знізіць спажыванне газу, але і знізіць сабекошт выпрацоўкі цеплавой энергіі.

Аляксандр Лукашэнка пацікавіўся, у чым перавага пелетаў. Было даложана, што яны кампактныя, экалагічна чыстыя, ад іх менш попелу і поўнасцю можна аўтаматызаваць працэс. У звычайным прыватным доме можна арганізаваць загрузку паліва раз у тыдзень і кіраваць працэсам з мабільнага тэлефона.

Прэзідэнт даручыў аснашчаць такімі кацельнямі малыя населеныя пункты. Кіраўніку дзяржавы таксама прадэманстравалі айчынныя катлы для пелетаў. У Беларусі іх вырабляюць ужо дзве кампаніі. «Малайцы! Дзякуй за катлы», – ацаніў прадукцыю Прэзідэнт.