Дабромысль сабраў аматараў валейбола

24 студзеня, зімовым цудоўным днём, сустракаў Дабромысленскі край гасцей валейбольнага турніру імя Уладзіміра Высоцкага. Трыццаць трэці раз дзверы спартыўнай залы ДУА «Дабромысленская сярэдняя школа» адкрыліся для валейбалістаў, гледачоў, а таксама для ўсіх зацікаўленых.

У валейбольным турніры сёлета прынялі ўдзел шэсць каманд: в. Дабромысль, філіяла «Дабромысль» ДП «Брэст-травы», «Сакалоўка» г. Івацэвічы, аг. «Святая Воля», аг. Жамчужны Баранавіцкага раёна, г. Баранавічы.

Спартыўнае свята суправаджалі песні Уладзіміра Высоцкага, а таксама фотавыстаўка самых цікавых момантаў валейбольнага турніру мінулых гадоў.

Пасля знаёмства з праграмай і першай гульні адбылося ўрачыстае адкрыццё турніру. З прывітальнымі словамі і пажаданнямі да ўдзельнікаў турніру і балельшчыкаў звярнуліся старшыня Волькаўскага сельсавета Ігар Карповіч, першы сакратар райкама ГА «БРСМ» Дзмітрый Токар, намеснік дырэктара па вучэбна-выхаваўчай рабоце ДУА «Дабромысленская сярэдняя школа» Святлана Канявега, ветэраны турніру Васіль Бахур і Мікалай Хвясько.

Вельмі напружаныя хвіліны ў гульні былі тады, калі вызначаліся пераможцы. Барацьбу за трэцяе месца вялі каманды аг. Жамчужны Баранавіцкага раёна і аг. Святая Воля. Перамогу атрымала каманда аг. Жамчужны. За першае месца змагаліся каманды в. Дабромысль і «Сакалоўка» г. Івацэвічы. Перамогу атрымала каманда з Дабромысля. Як гаворыцца, «дома і сцены дапамагаюць», а таксама падтрымка балельшчыкаў вельмі натхняе!

Пераможцы і прызёры турніру былі ўзнагароджаны кубкамі, медалямі і граматамі, а ад райкама ГА «БРСМ» усе каманды-прызёры атрымалі духмяныя пірагі. За актыўны ўдзел у турніры каманда філіяла «Дабромысль» ДП «Брэст-травы» атрымала ў падарунак валейбольны мяч ад райкама прафсаюза работнікаў АПК. Прызамі былі ўзнагароджаны ветэраны турніру Васіль Бахур і Юрый Філіпеня. Прыз самага актыўнага балельшчыка атрымаў Мікалай Хвясько.

Асаблівую падзяку хочацца выказаць Васілю Бахуру – галоўнаму суддзі, а таксама Вераніцы Шайковай, неаднаразовай удзельніцы турніру, якая на гэты раз была ў ролі балельшчыка.

Таксама былі вызначаны лепшыя ігракі ў намінацыях: «Лепшы нападаючы» – Аляксандр Каліноўскі, «Лепшы блакіруючы» – Максім Малевіч, «Лепшы разыгрываючы» – Алена Новік, «Лепшы лібера» – Арцём Мядзведзь, «Ветэран турніру» – Юрый Філіпеня, «Юны ігрок» – Іван Папко. Усе яны былі ўзнагароджаны граматамі і прызамі з рук дырэктара раённай спартыўнай аздараўленчай установы «Вымпел» Ірыны Салаўёвай.

Адначасова з валейбольным турнірам праходзіў турнір па настольным тэнісе пад кіраўніцтвам настаўніка фізічнай культуры і здароўя Аляксея Суржыка. Сярод мужчын першае месца заняў Сяргей Казанцаў з в. Дабромысль, другое – Аляксандр Кацаўман з в. Дабромысль, трэцяе – Віктар Вабішчэвіч з аг. Святая Воля. У жанчын перамогу атрымала Юля Бондар, другое месца заняла Аляксандра Петрушэвіч, трэцяе месца ў Сафіі Бабылёвай. Усе яны жыхаркі в. Дабромысль. Прымалі ўдзел і самыя юныя тэнісісты. Першым стаў Максім Сялейка з в. Дабромысль, другое месца ў Арцёма Берднікава з в. Дабромысль, трэцяе месца заняў Раман Салаўёў з г. Івацэвічы. Усе пераможцы і прызёры турніру па настольным тэнісе таксама былі ўзнагароджаны медалямі, граматамі і каштоўнымі прызамі.

Падчас турніру нашы выдатныя гаспадыні Святлана Скрабец, Таццяна Сцепанчук і Алена Сялейка частавалі гасцей гарбатай, кандытарскімі прысмакамі, а таксама дабромысленскай юшкай.
Спонсарскую дапамогу ў правядзенні турніру аказалі раённая спартыўна-аздараўленчая ўстанова «Вымпел», райкам ГА «БРСМ», філіял «Дабромысль» ДП «Брэст-травы», райкам прафсаюза работнікаў АПК, прадпрымальнікі Дзяніс Банкалюк і Мікалай Шаўчук.

Вялікая справа зацікавіць усіх на многія гады, і гэта менавіта чарговы валейбольны турнір у дабромысленскім краі. І ёсць той чалавек, без якога турнір не існаваў бы. Гэта ветэран педагагічнай працы, настаўнік фізічнай культуры і здароўя, Ганаровы грамадзянін Івацэвіцкага раёна – Аляксандр Сплендзер. Сваімі энергіяй, задорам і прыкладам ён зараджае людзей спортам.

Сцяпан Куніцкі, Таццяна Голік, в. Дабромысль.